– BE No 001-050

  1. Ringas ma ho tondingku Mamuji Debatanta i
    Ai diparmudumudu Ho unang halupahon i
    Disesa do dosamu Didaoni sahitmi Diudut do hosamu Diburi tondimi
    Huhut diapul-apul  Roham  na marsak i  Asa tung l am humibul   Mingot uhumna i
  2. Na tolhas do tu hita Uhumna na sumurung i Dibaen holong rohana  Di angka na porsea i
    Ai  ndada dilaluhon  Tu  hita rimas i  Sai lam dipatuduhon  DengganbasaNa i
    Ai songon hasundutan Dao sian purba i Holang dibaen Ibana Sude dosanta i
  3. Asi roha ni ama marnida anakkonna i Suman tusi Jahowa  Marnida na porsea i
    Diboto do mulanta Na sian tano i Tudoshon bungabunga Tudoshon bulung i Disi ro habahaba
    Mamintor habang be Suman tusi do jolma, Sai mate do sude.
  4. Tung asi ni rohana Sambing do na manongtong i Saleleng ni lelengna
    Di tonga huriana i Di surgo habangsana Hinaliangan ni Sude parhaladona
    Na sun badia i Na sai tongtong mamuji Pasangap Tuhan i
    Ho pe tondingku puji Tongtong goarNa i.

 

  1. Naeng pujionku Ho Jahowa Ai Ho do Debata na tutu i
    Sai suru Tondi Parbadia Tu au asa hupuji goarMi
    Marhitehite Jesus AnakMi Asa lomo rohaM di endengki
  2. Togihon ma au tu AnakMu Asa tu Ho ditogu au muse
    TondiM pasaorhon tu tondingku Manogu au di dalan na ture
    Asa tongtong gok dame rohangki Huhut girgir mamuji goarMi.
  3. Asi rohaM ale Jahowa Pamalo au mamuji goarMi
    Sai unang asal puas hata Ingkon tutu dipuji rohangki
    Ho Ama, Anak dohot Tondi i Doshon na jongjong au di joloMi

 

  1. Puji Jahowa ale tondingku Puji Ibana Debatami
    Tagan so suda dope bohalhu Naeng pujionku basaNa i.
    Sitompa daging tondi pe Ingkon dipuji sasude Haleluya, Haleluya
  2. Tubu ni jolma do nang na sangap Jala na mulak tu tano i
    Tahitahina pe laho do monjap Molo dibondut tanoman i
    Ndang jolma hasonanganki Debata do haposanki Haleluya, Haleluya
  3. Martua halak na niondingan Ni Debatanta Jahowa i
    Angka na hot marhaporseaon Di Jesus Kristus Tuhanta i
    Molo Debata donganmu Ndang adong hurang tuamu Haleluya, Haleluya.

 

 

  1. Sai puji Debata Dibaen asi rohaNa
    Huhut tongtong basa Di nasa tinompaNa
    Ria ma hita be Mamuji Debata
    Ai sesa do nuaeng Dosanta i dibaen
  2. Disuru Debata AnakNa Jesus Kristus
    Jadi mansai arga do hita on ditobus
    Diporsan Jesus i Dosanta sasude
    Asa mudarNa i Paias hita be.
  3. Dibahen i tama Pujion ni rohanta
    Tuhanta Debata Nang Jesus pe AnakNa
    Nang pangondian i Naung ro tu hita on
    Manggonti Jesus i Pujion do tongtong

 

  1. Sai tapuji ma Jahowa Debatanta na tutu
    Tapatimbul ma Amanta Na bonar huhut burju
    Binsan hosangki disi Pujionku Tuhanki
  2. Ndang haposan ni rohanta Dongan na di tano on
    Ai jotjot do mubauba Tahi ni rohaninon
    Dung i molo mate i Pesan ma tahina i
  3. Sai martua manang ise Siasahon Debata
    Ai dison pe dohot muse Dipasonang Debata
    Ala ni haposi ma holan Tuhan Debata
  4. Ai Ibana do Sitompa Langit dohot tano on
    Ro di isi ni sudena Sasude portibi on
    Debata haposan i Ai tongtong rohaNa i.
  5. Ai Ibana pasintongkon Uhum tu na pogos i
    Hangoluan ditumpakkon Tu na haleonon i
    Nang na hona hilang pe Dipalua do sude
  6. Sai Ibana patonggorhon Mata na mapitung i
    Pangapulon pe dihorhon Di parroha na tungki
    Sai diparhamaol tutu Nasa jolma na burju
  7. Sai Ibana mangondingi Na mabalu i sude
    Sai Ibana mangurupi Na tading di lampin pe
    Sogot uhumonna be Na tois roha i sude
  8. Debatanta do rajanta Salelenglelengna i
    Ala ni las ma rohanta Hita na porsea i
    Taendehon Debata Rap mandok Haleluya.

 

  1. Puji Jahowa na sangap huhut marmulia
    Hamu sude na parroha na ringgas na ria
    Marpungu be, marolopolop sude, Hamu sude manisia
  2. Puji Jahowa Sigomgom sude parluhutan
    Na manogihon ho songon niiring ni tangan
    Dohot hosam Songon hombar tu roham Sai diramoti Ibana
  3. Puji Jahowa naung tipak manompa dagingmu
    Jala na tongtong manumpak hisar pamatangmu Jotjot do ro
    Pangurupina tu ho Uju na ro hagogotan
  4. Puji Jahowa situmpak sude ulaonmu
    Ai ditumpakhon tu ho tongtong hangoluanmu
    Ingot ma i, denggan basaNa do i, Tomutomuna sambing do
  5. Puji Jahowa tondingku pasangap goarNa
    Dohot sude na marhosa mamuji Ibana
    I do ture Baenon ni hita sude Sai taendehon ma amen.

 

  1. Puji hamu ma asi ni roha ni Tuhan Jahowa di halak Kristen i
    Ai naung diontang sude jolma Tu hangoluan na sora suda
  2. Tuhan Jahowa panggomgom di sude Nasa parhosa manomba Raja i
    Marloksaloksa suruanNa Mamujimuji tongtong goarNa
  3. Hamu parbegu unang ma tundal be Tu Tuhan Jesus ro ma hamu sude
    Ai naung ditongos do hatana Dosa sudena naeng sesaonNa.
  4. Dohot do bohal dilehon Debata Ndang marna hurang tuk songon na tama
    Udan pe dohot las ni ari Nasa parguna do dipasari
  5. I pe sai puji dengganbasaNa i asa lam ganda hasangaponNa i
    Tongtong do hita ramotanNa On pe tapuji basaNa.

 

  1. Jahowa, Jahowa, Jahowa Di goarMu ma hasangapon i,Amen, Amen
    Pujionnami do tongtong GoarMi di joroMon
    Sai naeng dohononku Badia, badia do goarMu Haleuya, Haleluya
  2. O Jesus, o Jesus, o Jesus GoarMi do Dipuji hami on Amen, amen
    Ho do disuru Ama i Na marholong roha i Asa saut malua
    Ma hami sian saluhut jea Pijuni Ho, Pinuji Ho.
  3. O Tondi , o Tondi, o Tondi Parbadia Pinuji dohot Ho Amen, amen
    Na sintong nang na tiur pe Nang na denggan sasude
    Ho do manuanhon Tu roha ni sude hajolmaon Haleluya, Haleluya

 

  1. Hupuji holong ni rohaMu O Tuhan Jesus Rajangki
    Tu Ho hulehon ma tondingku Ai i do pinangidoMi
    Huhalupahon ma diringku Mamingkir holong ni rohaMu
  2. Sai dilului Ho do ahu Au pe huhalungunhon Ho
    Ditaiti rohaMi rohangku Dibahen i hulehon do
    Dipillit Ho hian tondingku I pe hutodo Ho Tuhanku
  3. Huhilala ingkon martuhan Ingkon mangolu au di Ho
    Ndang jumpang au be hangoluan Aut unang dipatupa Ho
    Sai Ho do paradiananku Sai gok di Ho nama langkangku
  4. Di Ho saleleng ni lelengna Au on, o Jesus Tuhanki
    Ho ma nampuna sasudena Gogongku ro di artangki
    Ai naung dilehon Ho mudarMu Manggarar utang ni dosangku.
  5. Ai nunga tung diparhatoban Sibolis dohot dosa au
    Tuani ma Ho ro o Tuhan Mamorsan uhum na tu au
    Ditaoni Ho do hamatean Mambaen di ahu hangoluan.
  6. O Jesus uhir ma goarMu Torang bagas tu rohangkon
    Asa tarsurat di jolongku Holong ni rohaMi tongtong
    Hatangku ro di parangengku Ingkon dipuji do goarMu

 

  1. Hupuji hupasangap Ho Amang pardenggan basa
    Ai jadijadianMu do sude angka na masa
    Ditompa Ho do sasude Dagingku ro di tondi pe Pinuji ma goarMu
  2. Saluhut na tinompaMi Naeng sonang di rohaMu
    Arian dohot borngin pe Disarihon rohaMu
    Nang uhum di gomgomanMi Na tigor na sintong do i Pinuji ma goarMu
  3. Ndang dung tartading bangsoMi Naung pinillitMu jolo
    Sai Ho do haporusan ni Sude na ro na olo
    Ditogu Ho do sasude Asa tu hangoluan be Pinuji ma goarMu
  4. Tongtong pasangaponku Ho Saleleng au mangolu
    Paratarataonku do Barita ni goarMu
    Pamatang dohot tondingki Ingkon mamuji sangapMi Pinuji ma goarMu
  5. Antong ro ma hamu sude Saluhut na porsea
    Marolopolop hita be Mamuji Debatanta
    Na sun denggan do sasude Binaen ni Debatanta i Pinuji ma goarNa

 

  1. Aha ma endehonongku, asa pujionku Ho.
    Ale Tuhan Debatangku, sai urupi au gogo.
    Ai ndang tarpajojor ahu, asi ni rohaM di ahu.
    Ala ni hupuji Ho tung marribu hali do.
  2. Sai sungguli ma rohangku, mangendehon gogoMi.
    Dohot asi ni rohaMu, ro di habasaronMi.
    Ai i do dihatindangkon Tondi dohot pamatangku.
    Ala ni hupuji Ho tung marribu hali do.
  3. Ia godang ni dosangku dipingkiri rohangki.
    Longang situtu rohangku, manimbangi lambas ni.
    RohaMi ale Tuhanku, mida pangalaosingku.
    Ala ni hupuji Ho tung marribu hali do.
  4. Haholongon, habasaron Hata hangoluan i.
    Dohot angka haporsuhon, I do parhiteanMi.
    Manogihon au anakMu, masuk tu harajaonMu.
    Ala ni hupuji Ho tung marribu hali do.
  5. Sai patogu ma rohangku Pasangaphon goarMi,
    Dohot haporseaonku, asa tu gandana i.
    Sai pamasuk ale Tuhan, tondingki tu hangoluan.
    Mangendehon sangapMi salelenglelengna i.

 

  1. Dipuji rohangkon do Ho Jahowa, Tuhanki
    Huhut hubaritahon do Sude pambaenanMi
  2. Huboto Ho do mual ni Na denggan sasude
    Dilehon Ho do sian i Godang di hami be.
  3. Ai aha ma adong hian di hami na lea?
    Sude dilehon Ho nian O Tuhan Debata
  4. Ai Ho do na margogo i Sitompa sasude
    Ho do na pangoluhon i Nang marmuduhon pe.
  5. Di langit ni langitan i na hembang songon haen
    Marriburibu bintang i Tung ise do mamabaen ?
  6.  Tung ise do na basa i Manatap hita be
    Na pabornokkon hauma i Parngolu di sude ?
  7. Gok eme angka sopo i Tung ise do mala
    Nang sasude bohalta i Nda Tuhan Debata ?
  8. I ma tutu, o Debata Dilehon Ho sude
    Ai Ho do na tongtong basa Manumpak jolma i.
  9. Dipinsang Ho pe hami on Dibahen dosa i
    Sai dipalambas Ho tongtong Roham na denggan i
  10. Ai molo marsak rohangki Dibahen dosa i
    Mura do mulak rohaMi Manesa salangki
  11. Diapul Ho do sasude Na marsak roha i
    Diduduk Ho iluna i Tu parningotanMi
  12. Sai disarihon Ho sude Di hasiangan on
    Tu daging nang tu tondi pe Panongos Ho tongtong
  13. Antong boasa ma tungki Ho ale tondingki ?
    Haposi ma Debatami Sitompa sasude
  14. Ndang dung marsala Debata Tu ginomgomNa i
    Ai manang dia pe dibaen Denggan ujungna i.
  15. Antong pasombu Debatam Mambaen ture langkam
    Asa tongtong sonang rohaM Timbul dohot tuam.

 

  1. Nda tama endehononku Goar ni Debatangki ? Nda tama halashononku Denggan ni basaNa i ?
    Ai sun holong ni rohaNa Mida au pardosa on Diramoti do tongtong Naposona Saluhutna
    Holong ni rohana i Nda tung hasuhatan i.
  2. Songon pidong rajauali Manjagai anakna i Songon i do dipabali Debatangku jea i
    Sian au niramotanna Olat ni na tubu au Sai diiringiring au Masuk tu harajaonNa
    Holong ni rohaNa i Nda tung hasuhatan i
  3. Nang AnakNa sasadasa Diseahon Debata Pangoluhon au pardosa Uju i di Golgata
    Mago au dibaen dosangku Jadi ro AnakNa i Manggarari utangki Lao mambaen haluaonku
    Holong ni rohaNa i Nda tung hasuhatan i.
  4. Dohot Tondi Parbadia Do disuru Amangki Asa dohot au badia Jala tau tu surgo i
    Naeng gohanna do rohangku asa sai tongtong torang Sai gok dame nang sonang
    Mandalani dalananku Holong ni rohana i Nda tung hasuhatan i
  5. Dohot haporseaonku Dilopokkon Tuhanki Tu bagasan ni rohangku
    Patiurhon dalanki asa sahat musengani Au tu hangoluan i
    Na rade di surgo i Di sude namanjalahi Holong ni rohaNa i Nda tung hasuhatan i.
  6. Songon i do panarihon Ni Debatangki di au Tuhanki do sumarihon
    Nasa na ringkot di au Tondi dohot pamatangku Dipangolu Tuhanki
    Na marasi roha i Diramoti do hosangku Holong ni rohaNa i Nda tung hasuhatan i
  7. Molo masa pangunjunan Dipasonggop setan i Debata do pangondingan
    Di au on anakNa i Ai didokkon Debatangku SurusuanNa i Manamparhon jea i
    Asa dao hamagoanku Holong ni rohaNa i Nda tung hasuhatan i
  8. Ganup ari do disesa Debatangku dosangki Ndang hea gotos rohaNa
    Maniopi rimas i Nang pe ingkon pinsangonNa Au dibahen dosangki
    Ndang maposihu disi Uhum na nidabuhonNa Holong ni rohaNa i Nda tung hasuhatan i
  9. Ala na so hasuhatan Holong ni rohaM Amang Tatap ma au on pasidung
    Nasa sangkap i rohaM Di naposoMon Tuhanku Pargogoi ma au tongtong
    Mangoloi di tano on Nasa na pinatikkonMu Paima Ho pujionki Salelenglelengna i.

 

  1. Puji hamu Jahowa tutu,
    Pardengganbasa,parasiroha salelengna i.
    Pardengganbasa i, parasiroha i.
  2. Ingot tongtong, ale tondingkon,
    Sude na denggan na dipasonggop Debata tu ho.
    Denggan basaNa do na pangoluhon ho.
  3. Nda tung adong, pargogo tongon,
    Na martudosan, tu Tuhan Debata di surgo i.
    Sun hinagogo, sun hinagogo i.
  4. Songkal tongtong, Jahowa tongon,
    Na marmulia, di sasude na tinompaNa i.
    Hamuliaon ma, di Tuhan Debata.
  5. Somba hamu, Jahowa burju,
    Marhapantunon, ma hita di Tuhanta Debata.
    Burju tasomba ma, Tuhanta Debata
  6. Sai burju be marende sude,
    Mamujimuji, Tuhanta Debata Jahowa i.
    Parasiroha i, na marmulia i.

 

  1. Aut na saribu hali ganda saringar ni soarangki
    Naeng nasa gogo bahenonku mamuji Debatantai
    Paboa las ni rohangki hinorhon ni pambaenna i
  2. Tung sura sahat soarangku tu ujung ni portibion
    Naeng nasa jolma haraonku mamuji Debata tongtong
    Tama do nasa hosangki hubaen pasangap Tuhani
  3. Unang ma modom Ho tondingku . sai ngot ma ho sai hehe ma
    radot ma ho di ulaonmu sai puji Tuhan Debata
    sai pangke nasa malomi mamujimuji Tuhan i
  4. Mauliate ma rohangku di Ho o Debata tongtong
    dibaen sude denggan basamu naung nilehonmu di au on
    ai dipatongon ho tongtong sude na ringkot di au on
  5. Hupuji dohot Ho o Jesus Marningot asi ni rohaM
    Marningot mudarMi na durus Ro di sude dengganbasaM
    Patupa haluaon i Di au pardosa godang i.
  6. Ho pe o Tondi Parbadia Dipuji endeendengkon
    Margogo jala marmulia Do Ho mangapul rohangkon
    Molo hubaen na denggan i Hinorhon ni gogoM do i
  7. Ai ise do mamasumasu Au on o Debata nda Ho ?
    Pamatangkon ro di tondingku Sai diparmudumudu Ho
    Huhut lambas do rohaMi Manatap pardosaonki.
  8. Sai pujionku do basaM Saleleng na mangolu au
    Pasangaponku do goarMu Saleleng na marhosa au
    Maradu tos pe hosangki Naeng pujionku sangapMi.
  9. Sai jalo ma ale Tuhanku Pamujingkon na hurang i
    Di surgo pe padengganonku Dung sahat au di lambungMi
    Marloksaloksa hali do Disi endehononku Ho.

 

  1. Tapuji ma Tuhanta Sian sandok rohanta
    Dibaen dengganbasana Di hita huriaNa
  2. Dilehon do hita Pamatang nang tondinta
    Diudut do hosanta Dijaga nang ngolunta
  3. Disuru Debatanta Do Jesus i AnakNa
    Mamboan hatuaon Di nasa hajolmaon
  4. Naung sesa do dosanta mangolu do tondinta
    Godang nuaeng jambarta Di surgo jaloonta.
  5. I pe hupuji hami BasaM i Tuhannami
    Ho na marasiroha Di nasa manisia
  6. Sai pargogoi ma hami Paringgas rohanami
    Mamuji Ho Jahowa Saleleng ni lelengna.

 

  1. Raja na tumimbul Sigomgomi hami Jalo ma pujiannami
    Denggan ni basaM do Pangoluhon hami Atik pe mardosa hami
    Sai apoi pargogoi hami mangendehon SangapMi o Tuhan
  2. Sai dipuji langit JadijadianMu Saluhut pambahenanMu
    Parsinondang bolon Na marpamongguri Ho o Tuhan do dipuji
    Bulan i Bintang pe Ho do pinujina Dohot sinondangna
  3. Dohot do tondingku Tungkap di adopan Ni habangsaMi o Tuhan
    Nang sude donganku Nasa na marhosa Pujionna do Jahowa
    Sai tongtong Na sintong Holan Debatanta Do sipujionta.
  4. Nasa na tumanda Tuhan Jesus Kristus Sai endehon ma goarNa
    Nasa na posea Sai ringgas patulus Na sinangkap ni Tuhanta
    Sai tongtong Ingot on Tongtong pujionta Sogot Debatanta.

 

  1. Ungkap bahal na umuli, bagas ni Debatangki.
    Ai tusi do au naeng muli, ganup jumpang Minggu i.
    Hulului do disi, bohi ni Debatangki.
  2. Nunga ro au, o Tuhanku, ro ma Ho tu au muse.
    Ai di bagas ingananMu, las ni roha do sude.
    Sai bongoti rohangkon, baen ma JoroMi dison.
  3. Sai pantun pangalahongku Maradophon bohiMi
    Sai suruhon tu rohangku Tondi Parbadia i
    Asa sai tongtong ture Tangiangku ende pe
  4. Doshon hauma na dumengan Ma rohangku di joloM
    Sai lopokkon ma na dengganTu bagasan rohangkon
    Sai tumpahi hataMi Asa marparbue i
  5. Baen togu haporseaon Dibagasan rohangki
    Asa unang be rampason Ni sibolis artangki
    Sai ditogu hataMi Ma au on tu surgo i
  6. Pangkulingi au Tuhanku Asa hutangihon Ho
    Patandahon tu rohangku Na tau pasangaphon Ho
    Sai pabosur tondingki Dohot asiasiMi

 

  1. O Jesus tatap ma tuson Pasaor TondiM tu hami on,
    Sai rohanami dirajai Dalanannami dipasae.
  2. Pamujinami baen ture Buhai ma rohanami be
    Patinggil pinggolnami i Lao tumangihon hataMi
  3. Haporseaonnami on Patogu ma sadari on
    Papintor langkanami be Tu surgo i tu lambungMi
  4. Pamasuk hami on sude Dung suda bohalnami be
    Tu angka na di surgo i Tongtong mamuji goarMi
  5. Di Ama na sumurung i Angka di anakNa Jesus i.
    Di Tondi Parbadia pe Ma hasangapon sasude.

 

  1. O Jesus Tuhannami Sai tatap hami on
    Asi rohaM di hami Palua hami on
  2. Naeng ihuthononnami Na pinatikkonMi
    Naeng pasidingonnami Sogo ni rohaMi
  3. Naeng lam botoonnami Taringot tu sude
    Tinaon ni Tuhannami Uju targantung i.
  4. Luhutna dosanami Diporsan Ho disi
    Unang saut mate hami Dibahen dosa i.
  5. On pe o Tuhannami Tumpahi hataMi
    Masuk tu rohanami Paian ma disi

 

  1. Bege ma sude hamu Bege ma na marsak roha
    Nunga mate utangmu Nunga sesa sude dosa
    Ala asi roha ni Anak ni Debata i.
  2. I ma Tuhan Jesus i Sipalua manisia
    Ditadingkon surgo i Asa gabe jolma Ia
    Tung mudarNa do use Asa sae dosanta be
  3. Bege ma hamu sude saluhut na marsak roha
    Ndang adong na mago be Anggo angka na porsea
    Di Tuhanta Jesus i Na humophop sasude

 

  1. Nunga ro di parguruan Hami on,na dison Masihangoluan
    Jesus,sai huingot hami HataMi,nidokMi Ho naeng dongannami.
  2. Baen ture pingkirannami Unang lao tu na dao Mampar rohanami
    Sai patinggil pinggolnami Tu hataM asa lam Huantusi hami
  3. Suru Tondi Parbadia Baen ture hami be Ringgas jala ria
    Asa bali haliluan Jea pe sasude Timbul hangoluan.
  4. Pabotohon ma tu hami Holong ni rohaMi Na pangolu hami
    Asa lam mardosniroha Hami on, sai tongtong Mangalo na roa.
  5. Jesus ndang diparsineang RohaMi hata ni Na ro martangiang
    I do pos ni rohanami Mida Ho, na dung ro Paluahon hami.

 

  1. Jesus hami ro dison Asa masihangoluan
    I pe ro ma Ho tuson Jala baen ma pardomuan
    Ni TondiM tu tondinami Unang mampar rohanami
  2. Holom rohanami be Nang parbinotoannami
    Molo so ro TondiMi Manondangi rohanami
    Ingkon Ho do paturehon Dalannami sidegeon
  3. Sondang sian Debata Hatiuron sian ginjang
    Baen ture sondangi ma Rohanami asa sonang
    Lao manjalo hangoluan PinatupaMi o Tuhan

 

  1. Tatap hami on Na pungu dison Ai na naeng pujionnami
    Denggan ni basaM di hami Tatap hami on Na pungu dison
  2. Togu hami on Na mardosa on Ale Jesus Tuhannami
    Sai asi rohaM di hami Togu ma tongtong Na mardosa on.
  3. Sai ramoti be Hami on sude Maradophon musunami
    Asa unang mago hami Sai ramoti be Hami on sude
  4. Sai urasi be Hami on sude Asa muba rohanami
    Jala ias tondinami Sai urasi be Hami on sude.
  5. Sai ajari be hami on sude Asa lam huboto hami
    Dalan sidalanannami Sai ajari be hami on sude
  6. Sai pintori be Hami on sude Molo unduk rohanami
    Manopoti dosanami Sai pintori be Hami on sude
  7. Sai padungo be Hami on sude Unang loas modom hami
    Di bagasan dosanami Sai padungo be Hami on sude
  8. Sai pamasuk be Hami on sude Di na jumpang ajalnami
    Molo suda bohalnami Tu ingananMi Hasonangan i.

 

  1. HataMi ale Tuhanku Arta na ummarga i
    Sai paian di rohangku Unang so hutiop i
    Molo so be sitiopan Hata na badia i
    Aha nama haojahan Ni haporseaon i ?
  2. Ale Jesus sai matahon Sai ramoti ma au on
    Asa hot haporseaon Di bagasana rohangkon
    Sai paringas ma rohangku Mangoloi di hataMi
    Asa mauas di podaMu Songon si Maria i.

 

  1. Dame nimMu ale Jesus LehononMu di bangsoM
    TondiMi do na patulus HataMi tu naposoM
    Dangol hami jala pogos Ndang tau baen parhaladoM
    Tondi parbadia tongos Margogihon hami on
  2. Ale Tondi Sipardame Sai bongoti hami be
    Sai pasada rohanami Gok parbue baen sude
    Lam patinggil pinggolnami Tumangihon dasdasMi
    Asa ganda ringgasnami Pararathon hataMi.
  3. Sada siradotannami Dipangido rohami
    Ingkon holong rohanami Mida angka dongan i
    Asa tung margogo hami Patupahon hataMi
    Sumeahon dirinami Tu Ho nang tu dongan i.

 

  1. Haleluya ari Minggu Ari na dumenggan i
    Molo iba lao marpungu Dohot dongan Kristen i
    Ari na sumurung i Las ni rohangki do i
  2. Maradian do tondingku Di na jumping Minggu i
    Nasa arsak ni rohangku Hulonongkon do disi
    Tu bagasan roha ni Jesus Kristus, Tuhanki
  3. Na huula ganup ari Hutundalhon do disi
    Asa tarpasarisari Au ngolu ni tondingki
    Arta na ummarga i Jumpang au di Minggu i
  4. Lomo ni rohaM o Tuhan Naeng patupaonku do
    Parangengku hupadenggan Asa hupasangap ho
    Ulos hatigoran i Lehon ma di tondingki
  5. Sai pahehe ma rohangku Sai ajari ma au on
    Jala tongos pangapulMu Tu bagasan rohangkon
    Baen sombu sadari on Uas ni tondingkinon
  6. Pasupasu ma jamita Di huriaMi sude
    Sai pasongop tu pandita Nang tu angka guru pe
    Tondi Parbadia i Marsahala baen sude
  7. Paimbaru ma padanmu Dohot na porsea i
    Pargogoi ma siseanmu Pasangaphon goarMi
    Tangiangna, ende pe Sai tangihon ma sude.
  8. Sai urupi au Tuhanku Paujungkon ari on
    Di bagasan tangiangku Songon na hupungka on
    Sai huhalungunhon ma SabatM, o Debata.

 

  1. Hata ni Jahowa Sipadame jolma Hangoluan i
    Halalas ni roha Siapuli roha Ni na marsak i
    Gogo ni Debatangki Paluahon na porsea Sian nasa jea.
  2. Nasa tinahina Tagan so ditompa Tano on dope
    Nang na tinuduan Ni sude pelean Jumpang do muse
    Sangkap ni Amana i Dipatulus Jesus kristus Jolma i ditobus.
  3. Na rade di hita asi ni rohaNa Nang basaNa pe
    Nunga mate Kristus Nunga sun ditobus Hita on sude
    Sangap ma di Debata Na porsea di hataNa Do pangoluonNa
  4. Hata hangoluan Do nuaeng diboan Parjamita i
    Na lambok begeon i nuaeng dilehon Tu rohanta i
    Hita on dijamita i Ai didokkon be do hita Paubahon roha
  5. I do haojahan Na tongtong manahan Salelengna i
    I hajongjonganku I do haposanku Hangoluanki
    Gogongki tongtong ma i Mangihuthon tu hataNa Lao mambaen lomoNa.
  6. Jesus sai tangihon Na hupangidohon Sai asi rohaM
    Lehon sipargogo Asa lao tu surgo Au tu banuaM
    Unang so tu Ho au ro I pe molo tos hosangku Tiur baen dalanku.

 

  1. I ma tingki hasonangan Molo Ho o Jesuski
    Pinahusor di pingkiran Ro di asiasiMi
    Molo Jesus ni luluan Holan Jesus sinangkapan
    Tingki na lehet ma i Na pasonang roha i.
  2. Sai buas naeng lehononMu Jesus asi ni rohaM
    Sai girgir do topotonMu Na uasan di hataM
    Gok do mual hangoluan Di bagasan Ho, o Tuhan
    Jala sai dapotan do Sasude na ro tu Ho.
  3. Ala nii o Tuhannami Topot ma huriaMon
    Pasupasu dohot hami Gohi rohanami on
    Mauas songon si Maria Di hataM na sun badia
    Baen ma hami sasude Asa tung maruli be

 

  1. Jesus lehon hatorangan Hapistaran Mangantusi hataMi
    Lehon mata na marnida Dohot roha na umboto dalanMi
    Asa tongtong maradophon BohiMi mardalan hami
    Asa digomgomi TondiMi ma hami.
  2. Ganup ari ma ajari Hami na di haotoon i dope
    Asa lam porsea hami Ho sambing do hangoluannami i
    Lam lumeleng lam pasolhot Tu rohaM ma rohanami
    Hombar tu HataM ma pangalahonami
  3. Sai martua ma nasida Na mambahen Jesus haposanNa i
    Aut tung sura olo hita Jesus i baen parsigantunganta i
    Ale Jesus sai patogu Hami na di parporangan
    Asa dapot di ujungna hamonangan
  4. Sai tangihon ale Tuhan Molo martangiang hami be tu Ho
    Pasupasu marlobian LehononMu tu na ro manopot Ho
    Sai dongani nama hami Asa hot di parpadanan
    Mian hami sahat ro tu hasonangan.

 

  1. Ari na marhasonangan I ma ari Minggu i
    Ari i paradianan Ni na marulaon i
    Sai martua halak i Na ringgas marminggu i.
  2. Songon dia paheanku Mandapothon Debata ?
    Unduk serep ni rohangku I do abit na tama
    Dung adong na songon i Tau ma au di Tuhanki
  3. Ale Tuhan sai pangolu Jala sai ajari au
    Molo ganggu sai patogu Marsak pe apuli au.
    Tung patorang hataMi Sai tongong tu rohangki.
  4. Pasupasu pangajaran Na nidok ni hataMi
    Sai patogu parpadanan Ni na manangihon i
    Sai urupi ma na ro Martangiang dompak Ho.

 

  1. Nang lao ruar masuk pe Jesus sai dongani hami
    Pasupasu hami be Dohot hangoluannami
    Togu hami ale Tuhan sahat tu banuaginjang.

 

  1. Antong sai dok ma amen Patorus rohanami
    Tumangkup hataMi O Jesus Tuhannami
    Patongtong rohanami Marhite hite TondiMi ?

 

  1. Jesus do haholonganta Ai digarari do dosanta Tobusta do mudarNa i
    Daging dohot tondinami Tu Ho Jesus hulehon hami ai sonang do di tanganMi
    Sai jalo hami on Hami huriaMon AnakkonMu asi rohaM
    Denggan basaM Tumpakkon ma tu huriaM.

 

  1. Sude hami na dison marpungu Do padomu tangan i
    Patoguhon padan di mudarMu Tanda hot di Ho sude
    Jesus sai paboa ma di hami Lomo ni rohaM di endenami
    Dok ma amen situtu Dame, dame di hamu

 

  1. Pasu pasu hami O Debata nami
    Sai sondangkon bohiMi Tu na pungu on sude
  2. Lehon ma di hami Dame ganup ari
    Sai pasaor ma TondiMi Tu na pungu on sude
  3. Amen hudok hami Ale Tuhannami
    Na marasi roha i Sangap ma di goarMi

 

  1. Asi ni roha ni Tuhan Jesus Kristus Holong ni roha ni Debata
    Dohot parsaoran ni Tondi Mandongani Hita sasudena

 

  1. Paruak ma harbangan i Ai nunga ro Rajanta i
    Sigomgom raja sasude Sitobus hajolmaon pe
    Siboan hatuaon i Pasuang hasonangan i
    I pe tapuji ma Tuhanta Debata
  2. Na sun tigor do roha ni Na ro tumopot jolma i
    Ai Raja na badia do Huhut parasiroha do
    Pabalionna do sude Na mangarsahi hita be
    Ipe tapuji ma Tuhanta Debata.
  3. Martua luat huta pe Dung jinangkonna Raja i
    Rohanta pe sai sonang do Dung masuk Raja i naung ro
    Ai tiur do rohanta i Dung ro panondang i tusi
    Ipe tapuji ma Tuhanta Debata
  4. O Jesus ro ma Ho tuson Ai naung huungkap rohangkon
    Patongon asi ni rohaM Patolhas denggan ni basaM
    Tu au marhite TondiMi Togihon au tu surgo i
    Ai naeng tongtong disi Hupuji goarMi.

 

  1. Beha ma panjalongku Di Ho O Tuhanki ?
    Beha ma panomungku Di Ho o Rajangki ?
    Sondangi ma rohangku na holom na bodo
    Ai naeng patupaonku Las ni rohaM di Ho
  2. Pangisi ni SionMu Do mangolophon Ho
    Lao songon i rohangku Lao mandapothon Ho
    Na ringgas do rohangku Mamuji goarMi
    Na daulat do sangkaphu Patulus rohaMi
  3. Ai ndang adong na hurang Na pinatupaMon
    Mambaen tu au sumuang Dame ni rohangkon
    Ai di na marsak ahu Binaen ni dosa i
    Ro Ho ale Pangolu Mandaoni sahithi.
  4. Tung aha ma alana Umbaen ringkot roham
    Tumopot manisia Nda holong ni roham ?
    Nda asi ni rohaMu Di na tarsosak i ?
    Ai naeng pangoluonMu Sude naung mago i
  5. Di na tarihot ahu Ro Ho mananggal au
    Di na tarhurung Ho paluahon au
    Ho na pasangaphon Na lea on hian
    Ho do na pamorahon Na pogos on hian
  6. Hamu na holso roha Biaen ni dosa i
    Tangihon boaboa Na sian surgo i
    Naung ro do Sipalua Disuru Ama i
    Pasonang rohamuna Mamboan dame i
  7. Ndang be habiaranmu Sude pangago i
    Ai nunga ro Rajamu Mangalo saasude
    Maporus do luhutna Dibaen Rajanta i
    Rendep do sasudena Di adopanNa i
  8. Ro do Ibana sogot Di ari uhum i
    Ingkon disi tarsonggot Pardosa na tois i
    Alai na holong roha Marlas ni roha do
    Disi ma dohononna Pinuji Ho na ro

 

  1. Las be ma rohamuna Na igor roha i
    Naung ro do Rajamuna Mamboan tua i
    Ndang marpanggortap i Anggo di haroroNa
    Alai tuk do gogoNa Padaohon jea i
  2. Ndang dilului rohana Dison sonangna i
    Di surgo habangsaNa HarajaonNa i Ai naeng buni dope
    Di tano on sangapNa Dung tulus pe sangkapNa Patar ma i sude
  3. Hamuna angka raja Oloi ma Raja on
    Ai hangoluanmuna Do dipatupa on Ai molo tois hamu
    Manjua di hataNa Sai talu do rimasNa Mangago tu hamu
  4. Hamu angka na sangap Didok portibi on
    Ibana do sumangap Di hasiangan on Sai bege hatai
    Sai unang ma mandali HataNa nang sahali Tu rohamuna i
  5. Hamu na marsak roha Di hasiangan on
    Dibaen godang ni dosa Na di portibi on Sai hehe ma hamu
    Padirgak ulumuna Ai hamoraonmuna Do Jesus i tutu.
  6. Tibu ma ulahanna Manopot jolma i
    Sude hasangaponNa Tarida ma disi Sai borhat ma hamu
    Manomu Rajamuna Pagalak sulumuna Ibana ro tibu.

 

  1. Parripe ni Tuhanta Sai hehe ma hamu Sai jangkon ma Rajanta Marroha na burju
    Girgir ma hita be Marende di Ibana Manjouhon Hosianna Burju ma sasude
  2. Hamu na marsak roha Jonok do Raja i Na ro mangapul roha Ni nasa na tungki
    Torop nuaeng tahe Inganan hasonangan i I ma partangiangan Ni na porsea i
  3. Hamu na so mararta Di hasiangan on Na mora do Rajanta Na ro tu hita on
    SarihononNa do Saluhut na hasea Alai saluhut jea PabalionNa do
  4. Antong girgir ma hita Manomu raja i Mangungkap di Ibana Sandok rohanta i
    Denggan tabaen nuaeng Dalanna tu rohanta Na naeng pasonangonNa Tiur ma i tabaen
  5. Godang do lehononNa Di hita sasude Sai naeng do bongotonna Nuaeng rohanta be
    Tung ise hita on Manjua paluaon Manjua pasonangon Ni Raja i antong ?
  6. O Jesus sai bongoti Ma dohot rohangkon Asi rohaM ingani Ma tondingki tongtong
    Patiur langkangki Lao tu banuaginjang ai naeng marsonangsonang Hupuji Ho disi

 

  1. Hamu sude naung tinoruan Ni patik ni si Musa i
    Sai ro hamu tu hasonangan Na dibagasan Jesus i
    Ai nunga ditostosi Jesus do ihotihot i sibolis , mangagohon Tondimi.
    Dapothon ma nuaeng Tuhanmu , naung ro mambaen haluaonmu ;
    papos ma rohami disi
  2. Na ro ma Gurumi , tarehon pinggolna tu podaNa i
    naeng patuduhononNa dalan di ho nuaeng tu surgo i.
    Ai na buni anggo najolo , patar dodi sude na olo
    Porsea di Tuhanta i . Ibana do na paboahon
    Saluhut na hinalomohon ni Debata , AmaNa i.
  3. Na ro ma Rajami , sai jangkon Ibana tu roham , ale.
    HasangaponNa ditadingkon Mambuat dangolmi tahe
    Antong sai tiop ma tanganNa Paboa na nirajaanNa
    Huhut niramotanna ho Mangmangkon ma burjum,paboa
    Tundalhononmu do na roa Lao mangoloi RajaM naung ro
  4. Gok situtu hamoraonmu Di Jesus Kristus Tuhanmi.
    Tangkas ma i naeng etongonnu Gotaphon sian rohami
    Luhut na olo mago sogot Ai ingkon gabe parsidohot
    Ho tu banuaginjang i Saonari do helehetanna
    Na jumpang do hadenggananna Sai jangkon Jesus Tuhanmi

 

  1. Padiri rohamuna Hamu parroha i
    Naung ro do tuamu na Pasaehon dosa i
    Ro sian ginjang do Maningkir sidangolon
    Ni nasa hajolmaon Naeng buatonNa do
  2. Pauli di Ibana Ma rohamuna be
    Alai na so lomoNa Padao ma sasude
    Dalanna naeng ture Lao bongot tu rohanta
    Ipe na tau sabatNa Pabali ma sude.
  3. Parroha haserepon Naeng topotonNa do
    Parroha hajungkaton Sai oloonNa do
    Parroha na ture Na unduk di hataNa
    Na olo toguonNa Ditopot Jesus i.
  4. Asi rohaM Tuhanku Parade ma au on
    Manjangkon tu rohangku Ho hatuaonkon
    Bongoti rohangkon Disi ma Ho maringan
    Sai Ho ma ale Tuhan Nampuna au tongtong

 

  1. Hamuna na porsea i Sai tomu Tuhan Jesus i Pahehe rohamuna
    Jonok do ari pesta ni Saluhut huriaNa i I ma hatutubuNa
    I pe hehe ma hamuna Baen pantunna lao manjangkon Na manopot hajolmaon.
  2. Marlas ni roha situtu Saluhut halak na burju Lao mangihuthon Jesus
    I pe pataridahon ma Las ni roham di Debata SangkapNa ma patulus
    Puji puji Jesus Kristus na manobus tondimuna Sian hamagoanmuna
  3. Sigati rohamuna be Sai tanda dosamu sude Paringkot rohamuna
    Manjangkon Sipalua i Na tuat sian surgo i Manggarar utangmuna
    Tanda hata Hangoluan na binoan ni Tuhanta Na pasae sude dosanta.
  4. Ai molo so diboan ho Dosam tu Jesus i na ro Ndang saut be ho malua
    Tongtong ma songgop rimas ni Jahowa Debatanta i Tu ho na hum manjua
    I pe sude Angka dosa hinaroa ni rohamu Pasesahon tu Tuhanmu.
  5. O Debata, asi rohaM Tumatap hami huriaM Sai taiti rohanami
    Tu Jesus Kristus, AnakMi Naung ro tu hajolmaon i Baen hatuaonnami
    Tomos, gomos Baen ma hami mardalani tu na sonang Sahat tu banuaginjang.

 

  1. Hosianna Anak ni, Raja David ro tu hita
    Baen ture dalanna i, asa bongot tu rohanta.
    Baen ma gabagaba i, di Tuhanta na ro i.
  2. Hosianna ro ma Ho, tu bagasan rohanami;
    Na manomunomu Ho, ale Jesus Tuhannami.
    Las do rohanami i, molo bongot Ho tusi.
  3. Hosianna Raja ni Hadameon Ulubalang
    Nasa na binoanMi Dame dohot hasonangan
    Hami na hinophoMi Di nampuna i sude
  4. Hosianna Tatap ma Hami na nirajaanMu
    Togu ma tu Debata Hami angka siseanMu
    Sai sungguli hami on Mangoloi hataM tongtong
  5. Hosianna Saut ma baen Bagabaga ni Jahowa
    Nang buni dope nuaeng HasangaponMi di jolma
    Angka na porsea i Do mananda gogoMi
  6. Hosianna Pargogoi Hami sasude o Tuhan
    Asa gabe pangoloi hami na di pardangolan
    Di hataM na denggan i Asa pinatulus i
  7. Hosiana Anak ni Debata na gabe jolma
    Topot ma HuriaMi Asa ai tongtong martua
    Sangap ma di GoarMi Salelenglelengnai.

 

  1. Na sian ginjang do au ro Barita na imbaru do
    Huhut na uli situtu Huboan tu sude hamu
  2. Naung tubu do saborngin on Anak ni na marbaju on
    Anak na uli situtu Na gabe las ni rohamu
  3. I ma Tuhanmu Kristus i Na ro mangontok jea i
    Silehon tua di hamu Huhut sisesa dosamu
  4. Diboan hangoluan i Silua ni Amana i
    Ai naeng tu harajaon ni Pasuangonna jolma i
  5. On ma partinandaan ni Di bara dapotonmu i
    Peak di panggagatan do Huhut na binalutan do
  6. Boti didok barita i Tinongos tu parmahan i
    Tu nasa hajolmaon pe Ditongos Debata dope
  7. On pe rohangku tanda ma Luhutna i patangkas ma
    Ai ise Posoposo i ? Jesus alealem do i
  8. Tuani ma Ho Jesus ro Dangolhu dieahi Ho
    Ndang marsineang rohami Di au parhamagoan i.
  9. Longang tutu do rohangki Marnida pangalahomi
    Nang gok di Ho portibi on Martohap Ho di dangolhon
  10. O Jesus haholonganki Bongoti dohot rohangki
    Pabali sian sude Na tau mangago au muse
    11. Haleluya, Haleluya Na ro tu hita Debata
    Martua hita baenon ni Saleleng ni leleng na i.

 

  1. Di na saborngin i do binsar Panondang di tondinta i
    Padaohon saluhut na simpar Lao patiurhon sasude
    Sondangon ni Panondang on Muse sandok portibi on
  2. Ianggo ho ale tondingku Sai jangkon ma Panondang i
    Sai unang ma lea rohamu Dibaen hametmetonna i
    Pabalionna do sude Sibolis dohot dosa pe
  3. Panondang on do papatarhon Na so hea niidami
    Dibahen i sai hangoluhon Sondangna i tu tondimi
    Ai ido hasonanganmi Di na lao sego sasude
  4. Dibahen i sai marsinondang Ma baen haporseaonmi
    Padenggan jala sai patorang Roham ro di parangemi
    Paboa na marguna do Panondang na ro i di ho
  5. Jesus panondang na ummuli Na pasonangkon rohangki
    Togihon ma tondingku muli Tu surgo tu ingananmi
    Sai pujionku Ho disi Saleleng ni lelengna i.

 

  1. Ria ma hita sasude mamuji Debata
    Girgir ma parendenta be Ai i do na tama Ai i do na tama
  2. Diungkap Debatanta i Banuaginjang i
    Disuru do AnakNa i Hangoluanta i Hangoluanta i
  3. Ampuan ni AmaNa do TinadingkonNa i
    Tu hasiangan on do ro Tu pardangolan i Tu pardangolan i
  4. Sitompa nasa na adong,sigomgom sasude
    Ro songon i tu tano on. Manaon na porsuk i Manaon na porsuk i
  5. Dibahen i las situtu do rohangkon nuaeng,
    Hujangkon Jesus i tutu, ai sonang au dibaen, ai sonang au dibaen.
  6. Antong hamuna sasude Pardosa na tungki
    Sai ungkap rohamuna be Manjangkon Jesus i, Manjangkon Jesus i
  7. Ringgas ma hita sasude Mamuji Debata
    Gogo ma taendehon be Amen Haleluya, Amen Haleluya

 

  1. Sai ro ma tu bara di Betlehem on Hamu na porsea hatop ma tu son
    Marnida halalasan ni rohanta i Tinongos ni Ama na di surgo i
  2. O ida hamu ma di bara inon Dakdanak na tubu disi borngin on
    Uli do rupana maa na tiur O bereng Ibana ho gabe tiur
  3. Las roha Maria nang Josep disi Marnida na metmet na sorang tusi
    Marsomba tu patna do parmahan i Di ginjang marende pardisurgo i.
  4. Pasinggang ma totmu hamuna sude Maniru parmahan marsomba muse
    Marende hamu na marlas roha i Maniru suruan na di ginjang i
  5. Sai dok ma O Anak ni Debata i Ho ro sian ginjang dibaen asiMi
    Di hami sudena na mardosa on Mambaen haluaon di hami tongtong
  6. Tung aha ulaning denggan di rohaM ? Silehononnami baen las ni rohaM ?
    Nang sere nang perak ndang pinangidoM Ai roha na ias sambing do lomoM
  7. Antong rohanami ma peleanMi O Jesus hasian sai jalo ma i
    Ias jala sonang ma baen angka i Tongtong gabe domu ma tu rohaMi.

 

  1. Marende ma hamu On ma dohononMu Holong ni rohanta Do Posoposo on
    Na mareakhon hita Tu atas tano on Tuhanki do Ho, Tuhanki do Ho.
  2. Malungun au di Ho O Jesuski naung ro Apul ma rohangku Saleleng au dison
    Asi rohaM di ahu Marnida dangolhon Taiti au tu Ho, Taiti au tu Ho
  3. Basa do Ama i Disuru Anak i Asa gararonNa Sude utangta i
    Huhut padirionNa Hasonanganta i Aut na sahat au, Aut na sahat au
  4. Tongtong di surgo i Hasonanganta i Sai mariaia Disi suruan i
    Nang angka na badia Naung tolhas ro disi Na masihol au, Naeng tusi ma au.